Рус Qaz Eng

ҰЛЫ ДАЛА АҢЫЗДАРЫ

26.10.2023  | Автор: Мусинова А.А.

Өмірбаяны

2 актілі балет.

Композиторлар - Ғазиза Жұбанова, Тілес Қажғалиев, Мыңжасар Маңғытаев, Мансұр Сағатов, Алмас Серкебаев, Нұрғиса Тілендиев, Әділ Бестібаев. Либретто, хореографиясы және қойылымы - Гүлжан Туткибаева. Қоюшы-суретшілер - Павел Драгунов, София Тасмағамбетова. Қоюшы-дирижер - Ерболат Ахмедьяров.

Премьерасы 2015 жылдың 20, 21 маусымында Абай атындағы Мемлекеттік академиялық опера және балет театрының сахнасында өтті. Қазақ хандығының 550 жылдығын атап өтуге арналған.

Кейіпкерлер мен орындаушылар: Сұлтан - Қанат Қаражанов; Сұлтанның қызы - Гүлвира Құрбанова, Әсел Құмарова (Асқарова); Жас батыр - Фархад Буриев, Нұрлан Қоноқбаев; Дала рухы - Нәйлә Кребаева, Динара Есентаева; Жат жұрттық әскерлердің басшысы - Азамат Асқаров, Данияр Шманов; Әскер басшылар - Әсет Мұрзақұлов, Рафаэль Уразов; Елік - Айнұр Әбілғазина, Айман Егісбаева; Сұлтан қызының құрбылары - Дания Батырханова, Анар Досқараева, Динара Құдабаева, Айман Егісбаева, Зарина Айшувакова, Камилла Омарова.

Ең күшті ұлыстардың бірінің сұлтаны өз халқының мәртебесін нығайта түсуді көздеп, жалғыз қызын ең лайықты жауынгерге тұрмысқа бермекші болады. Бүкіл даланы мұндай жаңалық дүр сілкіндірді. Болған оқиғаның бәріне бейжай қарайтын жалғыз Сұлтанның қызы. Ол далада құрбыларымен ойнап жүріп, елік аулап жүрген Жас батырды кездестіреді. Жарқын да нәзік сезімге берілген жастар бір-біріне адал болуға ант береді. Бірақ жат жұрттық әскердің барлаушылары Сұлтанның қызын әкесінің шатырынан ұрлап әкетеді.

Жат жұрттық әскердің басшысы өзіне қыздың тұрмысқа шығудан бас тартқанынан қанды соғысты бастайды. Дала рухы Жас батырға жат жұрттық шапқыншылық туралы ескертеді. Ұлы шайқас басталды, жау жеңілді. Ғашықтар өз бақытын тауып, Ұлы даланың Ұлы ханы атанған Жас батырды ұлықтаған халық қуанып жатыр.

Сілтемелер