МАМБЕТОВА Ляйля Әубәкірқызы

Өмірбаяны

18.03.1949, Алматы қаласы.

Балет әртісі, балетмейстер, педагог. Еуропалық университеттің өнертану ғылымдарының докторы (Халықаралық Ғылым академиясы. Мәскеу қ.), PhD докторы.

Дүниежүзілік жастар және студенттер фестивалінің лауреаты (Берлин, 1973; Мәскеу, 1985), «Қарагөз» халықаралық би байқауының лауреаты (Түркия, 1990), I- Бүкілодақтық эстрадалық би байқауының дипломанты (Кишинев, 1990).

1959-1968 - Алматы хореографиялық училищесінің оқушысы, педагогтар: М.Н. Шатловский, Р. М. Елшібекова, А. Г. Ғабитова, Ж. Т. Тастанова, М. З. Ахмедиева, Р. М. Курпешева, К. М. Жақыпова, С. А. Наурызбаева, Г. Х. Урманова.

1970-1977 - С. М. Киров атындағы ҚазМУ студенті. «Орыс тілі, әдебиеті» мамандығы бойынша білім алды.

1980-1985 - Н. А. Римский-Корсаков атындағы Ленинград мемлекеттік консерваториясының студенті. «Балет режиссурасы» мамандығы, «Қоюшы-балетмейстер» біліктілігі бойынша бітірді; педагогтары: П.А. Гусев, Г. Д. Алексидзе.

1968-1970 - Абай атындағы МАОБТ балет әртісі.

1970-1977 - ҚазКСР мемлекеттік ән-би ансамблінің солисі.

1977-1980 - Құрманғазы атындағы Алматы мемлекеттік консерваториясының аға оқытушысы. Осы кезеңде Мәскеудің жоғары театр оқу орындарында (К. Станиславский және В. Немирович-Данченко ат. театр мектебі, Б. В. Щукин және М. С. Щепкин атындағы театр училищелерінде тағылымдамадан өтті), О.В. Всеволодская-Голушкевичтің жетекшілігімен Болашақ актерлер үшін Қазақ биі бойынша эксперименттік курсты жүргізді.

1985-1986 - ҚазКСР мемлекеттік ән-би ансамблінің бас балетмейстері, мұнда «Кұсбегі дауылпаз» би сюитасы қойылды (муз. С. Мұхамеджанов).

1985-1990 - «Қазақконцерт» шығармашылық бірлестігінің бас балетмейстері және парторгы.

1988 - Марсель Марсоның халықаралық мимикалық драма мектебінде (Париж, Франция) қазақ би курсын жүргізді.

1990-1994 - Абай атындағы МАОБТ бас балетмейстері, Г. А. Алексидземен бірлесіп, Г. А. Жұбанованың «Карагөз» балетін қоюмен айналысты. Хореография мен либреттоның авторы бола отырып, М.Де Фальяның «Махаббат-сиқыршы» (Любовь волшебница), П. И. Чайковскийдің «Сиқырлы көл» («Волшебное озеро») балеттерін сахналады. Ол балалар операларында билер қойды: «Қар ханшайымы» («Снежная королева»), «Сиқырлы музыка», («Волшебная музыка»), «Ақшақар және жеті ергежейлі» («Белоснежка и семь гномов»), сондай-ақ театрдың опера репертуарындағы билер: «Риголетто» Дж. Верди (1993), М. Фон Вебердің «Сиқырлы атқыш» («Волшебный стрелок»), Е. Р. Рахмадиевтің «Қамар-Сұлу», Е. Р. Рахмадиевтің «Алпамыс» және т. б.

1994-2006 - Жоғары хореография мектебінің аға оқытушысы, хореография факультетінің жалпы пәндер кафедрасының меңгерушісі.

2006-2007 - А. В. Селезнев атындағы АХУ-дың көркемдік жетекшісі, түлектері оның басшылығымен Сеулге (Оңтүстік Корея) концерттік бағдарламамен (2007) барды. Т.К. Жүргенов атындағы ҚазҰӨА-да екі балетмейстер курсын бітіргізді. (2005, 2006).

2015 - Абай атындағы ҚазҰПУ «Музыкалық білім және хореография» факультетінің хореографиялық пәндер оқытушысы.

2006 жылдан - «Қазақстан балет әлемі» журналының бас редакторы. ҚР ЮНЕСКО мүшесі.

«Азия дауысы» (1990), «Шығыс маусымы» халықаралық байқауларының қоюшысы (1995). «Қазақстан хореографиясының тарихы» хореография өнері бойынша алғашқы Қазақстандық оқулықтың тең авторы (2006). Б. Мейірбеков атындағы балет студиясына арналған «Impressio» («Шабыт») балетінің либреттосының авторы, премьерасы опера және балет театрының ашылуында өтті (Шымкент, 2007). Шығармашылық қызметінің әртүрлі кезеңдерінде Режиссерлік жобалар, драмалық спектакльдерге арналған хореографиялық нөмірлер: Қазақ мемлекеттік академиясында, М. Әуезов атындағы Мемлекеттік академиялық қазақ драма театрында, М. Ю. Лермонтова орыс драма театрында (Абакан қ., Хаккасия, РФ) жүзеге асырылды.