ТАЛПАҚОВА Гүлжан Ізімқызы

Өмірбаяны

ТАЛПАҚОВА Гүлжан Ізімқызы (12.09.1948 ж., Атырау қ.) - биші. ҚазКСР еңбек сіңірген әртісі (1971 ж.); ҚазКСР Халық әртісі (1981 ж.).

1967 ж. - Республикалық эстрада-цирк өнері студиясын бітірген, педагогтары: Ш.Б. Жиенқұлова, Г.Б. Қиякова, М.Н.Шатловский.

1967-1969 - Шығармашылық жолын «Қазақконцертте» бастады;

1969-1973 - «Гүлдер» мемлекеттік жастар-эстрадалық ансамблінде солист болып жұмыс істеді.

1973 жылдан «Қазақконцерт» гастрольдік-концерттік бірлестігінің солисі. Репертуарына әлем халықтарының билері мен «Айжан қыз», «Қос алқа», «Алтын қырғауыл» атты қазақ билері енді. Ш. Жиенқұлова мен Н. Тапалованың халық билерін жеке орындау мектебінің жалғастырушысы.

1977-1979 жылдары Мәскеу эстрадалық студиясында тағылымдамадан өтіп, онда жеке концерттік бағдарлама дайындады. Осы бағдарламамен Қазақстан облыстары бойынша гастрольдік сапарда болды. Еуропа, Америка, Азия және Африка елдерінің үздік сахналарында табысты өнер көрсетті. Әлемнің 52 елінде қазақ өнерінің өкілі ретінде гастрольдік сапарда болды. Софиядағы Дүниежүзілік жастар мен студенттер фестивалінің лауреаты (1968).

2000 жылдан бастап Атырау қалалық мәдениет сарайы директорының орынбасары болып жұмыс істейді. Атырау қаласындағы Құрманғазы балалар би шығармашылығын дамыту бойынша қоғамдық және қайырымдылық жұмыстарымен белсенді түрде айналысады.