ҚАЙЫРБЕКОВ Бақыт Ғафуұлы
Өмірбаяны
(23.02.1953, Алматы қ.) – ақын, аудармашы, кинорежиссер, сценарист, либреттист. Қазақстанның еңбек сіңірген қайраткері (2002), «Құрмет» орденінің иегері (2016), ҚР Жазушылар одағы мен Кинематографистер одағының мүшесі, Еуразиялық телевизия және Радио академиясының академигі (Мәскеу, Ресей).
А.М.Горький атындағы Мәскеу әдеби институтын (1975), Абай атындағы Қазақ педагогикалық институтының аспирантурасын (1982), КСРО Госкино жанындағы сценаристер мен режиссерлердің жоғары курстарын (1989) бітірген.
15-тен астам поэтикалық жинақтың, 5 кітаптың авторы, белгілі қазақ ақындары мен прозашыларының шығармаларын орыс тіліне аударды. Қазақ халқының тарихы мен мәдениетіне арналған жүзден астам деректі фильмнің сценарисі және режиссері, халықаралық кинофестивальдердің қатысушысы және жеңімпазы. «Astana Musical» (2016) театрында «Достар серті» («Клятва друзей»); «Астана – менің махаббатым» («Астана – любовь моя») Бейбітшілік және келісім сарайы (2017) жастар мюзиклдерінің либреттосының, ән мәтіндерінің авторы.
«Әлем» (Н. Дмитриевскийдің хореографиясы 2014); М. Авахри хореографиясында «Жусан» (2014), «Махаббат тілі» (2016), «Сұлтан Бейбарыс» (2020), «Жібек жолы» (2022); А. Садықованың хореографиясында «Желтұранғы туралы аңыз» (2020); Патрик де банның хореографиясындағы «Дала дауысы» («Зов степи» 2020) балеттеріне либретто жазды.
Марапаттары: Махамбет Өтемісов сыйлығының лауреаты (2000); «Қазақстан Республикасының Тәуелсіздігіне 10 жыл» медалі (2001); «Экран шебері» медалі (2009); «Қазақстан Республикасының Конституциясына 20 жыл» медалі (2015); «Қазақстан Республикасының Тәуелсіздігіне 25 жыл» медалі (2016); «Астанаға 20 жыл» медалі (2018), «Әл-Фараби атындағы Қазақ ұлттық университетіне 80 жыл» медалі (2018); «Сұлтан-Ахмет Қожықов – 95 жыл» медалі (2018), «Батыр Шапағаты» медалі (2019), «Қазақстан халықтары Ассамблеясына 25 жыл» медалі (2020), «Ұлы Эль Тарандылары» («Таранды Великого Эля»), медалі (2021); Ресей Федерациясы мен Украинаның журналистер одақтарының Халықаралық конференциясының «Келісім» («Согласие») ордені, ТҮРКСОЙ ұйымының «Entur Nisani» ордені.
Сілтемелер
Медиа галерея
ҚАЙЫРБЕКОВ Бақыт Ғафуұлы
ҚАЙЫРБЕКОВ Бақыт Ғафуұлы