КАУКОВ Сержан Тоқтарбайұлы

Өмірбаяны

(02.06.1979, Алматы қ.) - балет солисі, педагог, хореограф. Қазақстанның еңбек сіңірген қайраткері (2013); «Дарын» мемлекеттік жастар сыйлығының лауреаты.1990-1998 - А. В. Селезнев атындағы АХУ-сін Ұ.А. Мерсеидов сыныбы бойынша аяқтады.

2006 - М.Әуезов атындағы ОҚМУ бакалавриатын «Хореограф» мамандығы бойынша бітірген.

2021 - «Хореография педагогикасы» бағыты бойынша ЮУрГГПУ (Челябі қ.) магистратурасын бітірді.

Хореографиялық училищенің қабырғасында балет байқауларына қатыса бастады. 1998 - «Ваганова-Prix» Халықаралық балет байқауының І-сыйлығы мен алтын медалі; «Арабеск» байқауының III- сыйлығы және Көрермендер көзайымы сыйлығы, Пермь; III- сыйлық, қола медаль және Масако Оя сыйлығы, Париж; «Майя» халықаралық байқауының арнайы сыйлығы және дипломы.

1998-1999 - Абай атындағы МАОБТ-ның жетекші солисі.

2000-2002 - «Францияның жас балеті»труппасында биледі (Kiel театры).

2002-2006 - С. Радченконың орыс ұлттық балеті труппасының әртісі және Г. Таранданың жетекшілігімен императорлық Орыс балеті солисі.

2006-2013 - К. Байсейітова атындағы ҰОБТ-ның жетекші солисі.

2013-2016 - «Астана Опера» театрының жетекші солисі. Классикалық және Ұлттық балеттердегі партияларын орындады. Репертуары: Зигфрид («Аққу көлі»), Альберт («Жизель»), Базиль («Дон Кихот»), Вацлав («Бахчисарай бұрқағы»), Щелкунчик-ханзада («Щелкунчик»), Солор («Баядерка»), Арыстан («Алкисса»), Нарша («Карагөз»), Князь Дезире («Ұйқыдағы ару»), Колен («Бекер сақтық», «Тщетная предосторожность»), Джеймс («Сильфида»), Феб («Эсмеральда»), Франц («Коппелия»), Меркуцио («Ромео мен Джульетта»), Красс («Спартак») және т.б. Сахналық шығармашылығын аяқтағаннан кейін ол оқытушылық қызметке ауысты.

2016-2020 - Қазақ ұлттық хореография академиясында «Классикалық би» және «Дуэтті-классикалық би» пәндерін жүргізді. 2021-2023-спорттық гимнастика және жеке балет студияларында хореограф.

Марапаттары: TURKSOY сыйлығының лауреаты (2010).